દમણગંગા નદી કિનારે ઇન્ડસ્ટ્રીયલ ઝોન માટે વૃક્ષો કાપી જમીન સમથળ કરવાની કામગીરી અંતિમ તબક્કામાં
વાપીમાં GIDC વિસ્તારમાં દમણગંગા નદી કિનારે આકાર લેનારા ઇન્ડસ્ટ્રીયલ ઝોન માટે ફાળવાયેલ 200થી વધુ એકરની જમીનમાં થોડા દિવસ પહેલાં એક ઉદ્યોગ ગ્રુપે ઝાડ કાપવાની મંજૂરી લઈ ઝાડ કાપવાની શરૂઆત કરી હતી. સાગ સહિતના 5000 જેટલા ઝાડ કાપવાની આ કામગીરી હાલ અંતિમ તબક્કામાં છે. આગામી દિવસોમાં અહીં પ્લોટનું વિભાજન કરી બાંધકામ નિર્માણની પ્રક્રિયા હાથ ધરાશે તેવું સૂત્રો પાસેથી જાણવા મળ્યું છે.
ઔદ્યોગિક નગરી ગણાતા વાપી GIDC માં હાલ ઉદ્યોગોને ફાળવી શકાય તેવી જમીન બચી નથી. ત્યારે વર્ષો પહેલા દમણગંગા નદી કિનારા નજીક GIDC એ જમીન ફળવ્યા બાદ એક ઉદ્યોગ ગ્રુપે આ જમીન પર ઝાડ રોપી જંગલ ઉભું કર્યું હતું. વર્ષ 2022માં 200 થી વધુ એકરની કરોડોની કિંમતની જમીનમાં ઇન્ડસ્ટ્રીયલ પાર્ક બનવાનો છે. જે માટે વાપી જીઆઇડીસી કચેરી મારફતે વાયબ્રન્ટ ગુજરાત સમિટમાં વાપીની ખાનગી કંપનીએ 5000 કરોડના MOU કર્યા છે.
...
