વાપીમાં એક રીક્ષા ચાલકને અપશબ્દ કહેવાય તેવો સવાલ પૂછી રાતોરાત સોશ્યલ મીડિયામાં જાણીતી બનેલી દમણની કથિત મહિલા પત્રકાર અને બીજી દાદરા નગર હવેલીની કથિત પત્રકાર અને વાપીના કથિત પત્રકાર વિરુદ્ધ ખંડણી માંગવાની 2 અલગ અલગ ફરિયાદ નોંધાઇ હતી. જેમાં ફરાર ત્રણેય કથિત પત્રકારો પૈકી બે કથિત મહિલા પત્રકારોની વાપી ટાઉન પોલીસે ધરપકડ કરી છે.
વાપીમાં બલિઠા ખાતે મસાજ પાર્લર ચલાવતા એક સ્પા સંચાલક પાસે પાંચ લાખની ખંડણી માંગનારા અને એક તબીબ પાસે ફોર્ચ્યુનર કારની ડિમાન્ડ કરી 1.80 લાખ પડાવનારા 3 કહેવાતા પત્રકારો પૈકી 2 કથિત મહિલા પત્રકારોની ટાઉન પોલીસે ધરપકડ કરી છે. આ અંગે વાપી ડિવિઝનના DYSP બી. એન. દવેએ વિગતો આપી હતી કે, આ ટોળકીએ આવા કેટલા લોકો પાસેથી ખંડણી વસૂલી છે. તેમની સાથે અન્ય કેટલા લોકો સંડોવાયેલ છે. તે અંગે તપાસ હાથ ધરી છે.
DYSP બી. એન. દવેએ જણાવ્યું હતું કે, વાપી ટાઉન પોલીસ સ્ટેશનમાં જીતેન્દ્ર રામપ્રસાદ પ્રવેશસિંહે ફરિયાદ નોંધાવી હતી કે તે બલિઠા ખાતે ખુશી મસાજ પાર્લર ચલાવે છે. આ મસાજ પાર્લરમાં વાપીના ત્રણ કહેવાતા પત્રકારો જેમાં એક પુરુષ ક્રિષ્ના ઝાં, અને 2 મહિલા સોનિયા ઉર્ફે સંધ્યા ચૌહાણ અને સેમ શર્માએ આવી જણાવ્યું હતું કે, તેના મસાજ પાર્લરમાં યુવતીઓ પાસે દેહ વ્યાપારનો ધંધો કરાવે છે. તે ધંધો કરવો હોય તો પાંચ લાખ રૂપિયા વાર્ષિક આપવા પડશે. જો પાંચ લાખ રૂપિયા નહીં આપે તો કોન્ડોમ મૂકી ખોટા સાક્ષી ઉભા કરી તેના સમાચારમાં છાપી બદનામ કરશું અને ધંધો બંધ કરાવી દઈશું.
કથિત પત્રકારોની આ ધમકીથી ગભરાયેલા જીતેન્દ્રએ વાપી ટાઉન પોલીસ મથકમાં ફરિયાદ નોંધાવી હતી. જે આધારે વાપી ટાઉન પોલીસે ફરિયાદ નોંધી હતી. જે સમાચાર માધ્યમોમાં પ્રસારિત થઇ હતી. જેથી અન્ય લોકોને જાણ થતા આ ત્રિપુટીનો ભોગ બનનાર ઉમરગામ તાલુકાના ફણસા ગામના ડોક્ટર રાકેશ દેવકી દાહોએ પણ પોલીસ સ્ટેશનમાં ફરિયાદ નોંધાવી હતી કે, ન્યૂઝપેપર અને યૂટ્યૂબ ના આ કથિત પત્રકારોએ તેમની પાસેથી પણ 1.80 લાખ રૂપિયા પડાવ્યા છે.
આ કથિત ત્રિપુટીએ તબીબના ફણસા ખાતે આવેલ ક્લિનિકમાં આવી વિડિઓ શૂટિંગ કર્યું હતું. તે બાદ તબીબ બોગસ ડોક્ટર હોવાનું અને દર્દીઓને ખોટી દવાઓ આપતા હોવાનું સમાચાર માધ્યમોમાં પ્રસારિત કરી બદનામ કરવાની ધમકી આપી હતી. તબીબે આ ત્રિપુટી સામે આજીજી કરતા ત્રિપુટી એ તેમને વાપી ખાતે આવેલ વાપી મીડિયા ચેરીટેબલ ટ્રસ્ટની ઓફિસે બોલાવ્યા હતાં. જ્યાં તબીબ પાસે ન્યુઝ નહિ ચલાવવા પેટે ફોર્ચ્યુનર કાર માંગી હતી. તબીબની હેસિયત ના હોય આખરે પાંચ લાખ રૂપિયા ની માંગણી કરી હતી. જે બાદ આ ત્રિપુટી એ જણાવ્યું હતું કે તેમની સાથે ટ્રસ્ટના અન્ય કુલ 12 જેટલા હોદ્દેદારો હોય 1.80 લાખ રૂપિયા આપી દે, તબીબે તે રૂપિયા ચૂકવ્યા હતા. જેની ફરિયાદ પણ વાપી ટાઉન પોલીસમાં દાખલ કરવામાં આવી હતી.
કહેવાતા કથિત પત્રકારો સામે 2 ફરિયાદ નોંધાતા શરૂઆતમાં ફરાર રહેલા ત્રણેય કહેવાતા પત્રકારો પૈકી બે મહિલા પત્રકાર સોનિયા ચૌહાણ અને સેમ શર્માએ વાપી કોર્ટમાં મુકેલ આગોતરા જામીન નામંજૂર થતા બુધવારે ટાઉન પોલીસ સ્ટેશનને શરણે થયા હતા. પોલીસે બંનેની ધરપકડ કરી આગળની કાર્યવાહી હાથ ધરી છે.
આ અંગે વધુમાં DYSP બી. એન. દવે એ જણાવ્યું હતું કે આ ટોળકીએ ક્યાં ક્યાં અને કેટલા પૈસા કેટલા લોકો પાસેથી પડાવ્યા છે. કેટલા લોકોને બ્લેકમેલ કર્યા છે. તે બાબતની તપાસ ટાઉન પોલીસે હાથ ધરી છે. આ ત્રિપુટી વાપી ચેરીટેબલ ટ્રસ્ટ નામની સંસ્થામાં સેક્રેટરી, ટ્રેઝરર અને જોઈન્ટ ટ્રેઝરરના હોદ્દા ધરાવે છે. એટલે અન્ય કોઈ હોદ્દેદારો આ પ્રવૃત્તિમાં સંડોવાયેલા છે કે કેમ તે તપાસ કરી તેમની વિરુદ્ધ પણ પગલાં લેવામાં આવશે.
DYSP બી. એન. દવેએ વાપી ની જાહેર જનતાને અપીલ કરી છે કે આ કથિત પત્રકારોનો કે તેની સાથેના અન્ય કથિત પત્રકારોનો જે કોઈ ભોગ બનેલ હોય, તેમની પાસેથી પૈસા પડાવ્યા હોય તેવા લોકો પણ વાપી ટાઉન પોલીસ સ્ટેશનમાં અથવા ડીવાયએસપી ઓફિસે આવી ફરિયાદ નોંધાવશે તો તે ફરિયાદ આધારે તેવા પીડિત લોકોને પણ પોલીસ ન્યાય અપાવશે. ત્યારે હવે આ અપીલ આધારે વધુ લોકો પણ ખંડણી માંગતા અને બ્લેક મેઇલીંગ કરતા આ પત્રકારો વિરુદ્ધ ફરિયાદ કરવા આગળ આવી શકે છે.