વલસાડ જિલ્લાના વાપી, ઉમરગામ સહિત સંઘપ્રદેશ સેલવાસ અને દમણ વિસ્તારમાં શનિવારે સાર્વત્રિક વરસાદ વરસી રહ્યો છે. તો, સેલવાસના ઉપરવાસમાં પણ ભારે વરસાદના કારણે મધુબન ડેમમાં નવા નીરની આવક થઈ છે. ડેમના કેચમેન્ટ એરિયામાં વધતા પાણીને કારણે ડેમના 4 દરવાજા 0.50 મીટર સુધી ખોલી દમણગંગા નદીમાં 8208 ક્યુસેક પાણી છોડવામાં આવી રહ્યું છે.
ભારે વરસાદ સાથે જિલ્લાના સૌથી મોટા ડેમ એવા મધુબન ડેમમાં પણ નવા નિરની આવક થઈ છે. મધુબન ડેમમાં હાલ 14216 ક્યુસેક પાણીની આવક થતા ડેમની સપાટી 71.60 મીટર પહોંચી છે. ડેમના હાલ 4 દરવાજા 0.50 મીટર સુધી ખોલવામાં આવ્યા છે. અને દમણગંગા નદીમાં 8208 ક્યુસેક પાણી છોડવામાં આવી રહ્યું છે. 
વલસાડ જિલ્લામાં શનિવારે સવારના 6 વાગ્યાથી બપોરના 2 વાગ્યા સુધીમાં વરસેલા વરસાદની વિગતો જોઈએ તો, વાપીમાં અને ઉમરગામ, પારડી માં 03 ઇંચ જેટલો વરસાદ ખાબક્યો છે. વલસાડ તાલુકામાં સવા પાંચ ઇંચ તો, ધરમપુર અને કપરાડા તાલુકામાં 3 થી સાડા ત્રણ ઇંચ વરસાદ ખાબક્યો છે. 
વલસાડ જિલ્લામાં સીઝનના પડેલા કુલ વરસાદની વાત કરીએ તો, વલસાડ તાલુકામાં સિઝનનો કુલ 38ઇંચ વરસાદ વરસી ચુક્યો છે. ધરમપુર તાલુકામાં સિઝનનો કુલ વરસાદ 29 ઇંચ, કપરાડા માં 37 ઇંચ, પારડી માં 28 ઇંચ, વાપી માં 33 ઇંચ અને ઉમરગામ તાલુકામાં કુલ સિઝનનો વરસાદ 35 ઇંચ નોંધાયો છે.
આ તરફ સંઘપ્રદેશ દાદરા નગર હવેલીના સેલવાસમાં 24 કલાકમાં 4 ઇંચ ખાનવેલમાં સાડા પાંચ ઈંચ તો, દમણમાં સાડા ચાર ઇંચ વરસ્યો છે. સીઝનના સરેરાશ કુલ વરસાદની વિગતો જોઈએ તો સેલવાસમાં અત્યાર સુધીનો સિઝનનો કુલ વરસાદ 30 ઇંચ નોંધાયો છે. દમણમાં સિઝનનો કુલ વરસાદ 28 ઇંચ નોંધાયો છે.
