વાપીના હરિયા પાર્ક ખાતે આવેલ શ્રીજી એજ્યુકેશન એન્ડ ચેરીટેબલ ટ્રસ્ટ સંચાલિત સ્કૂલનો 13મો એન્યુઅલ ડે ઉજવવામાં આવ્યો હતો. વાપીના VIA ઓડિટોરિયમ માં આયોજિત આ કાર્યક્રમનું ઉમરગામના ધારાસભ્ય રમણલાલ પાટકર, શ્રી સ્વામિનારાયણ ગુરુકુળ સલવાવના કપિલ સ્વામી, હરિયા પાર્ક વિસ્તારના નગરસેવક નિલેશ રાઠોડના હસ્તે દીપ પ્રાગટય કરી શુભારંભ કરવામાં આવ્યો હતો.
શાળાના 13માં એન્યુઅલ ડે ની ઉજવણી પ્રસંગે વિવિધ સાંસ્કૃતિક કાર્યક્રમો પ્રસ્તુત કરવામાં આવ્યા હતાં. તેમજ શાળાનું નામ રોશન કરનાર વિદ્યાર્થીઓનું ઉપસ્થિત મહાનુભાવોના હસ્તે ટ્રોફી આપી સન્માન કરવામાં આવ્યું હતું. આ પ્રસંગે શાળાના પ્રિન્સિપાલ, ટ્રસ્ટીઓએ વિદ્યાર્થીઓ, વાલીઓને આવકાર આપી શાળાનો વાર્ષિક રિપોર્ટ રજૂ કર્યો હતો.
શ્રીજી એજ્યુકેશન સ્કૂલ વાપીના પ્રિન્સિપાલ રેણુકા ઠક્કરે જણાવ્યું હતું કે, આ શાળા ગુજરાત બોર્ડ એફિલેટેડ છે. શાળામાં નર્સરી, કેજી થી ધોરણ 8 સુધીના બાળકોને અભ્યાસ કરાવવામાં આવે છે. આગામી સમયમાં ધોરણ 9 અને 10ના અભ્યાસવર્ગોનો પ્રારંભ કરવામાં આવશે. શાળામાં 500 વિદ્યાર્થીઓ અભ્યાસ કરે છે. જેઓને CBSE લેવલનો અભ્યાસ કરાવવામાં આવે છે. NEET અને JEEની પેપર પેટર્ન હેઠળ વિદ્યાર્થીઓની પરીક્ષા લઈ ઉચ્ચ શિક્ષણ માટે તૈયાર કરવામાં આવે છે. આ 13મો વાર્ષિક ઉત્સવ હતો. જેમાં બાળકો દ્વારા વિવિધ સાંસ્કૃતિક કાર્યક્રમો રજૂ કરાયા હતાં.
કાર્યક્રમમાં સલવાવ સ્વામિનારાયણ ગુરુકુળ સંસ્થાના સ્વામી કપિલ સ્વામી, ઉમરગામ વિધાનસભાના ધારાસભ્ય રમણલાલ પાટકર, હરિયા પાર્કના નગર સેવક નિલેશ રાઠોડ, વાપીના જાણીતા ઉદ્યોગપતિ રમેશ કોટડીયા વિશેષ ઉપસ્થિત રહ્યા હતાં. જેઓએ વિદ્યાર્થીઓને અભ્યાસલક્ષી માર્ગદર્શન આપ્યું હતું. શાળા પરિવાર દ્વારા તમામ મહાનુભાવોનું સ્વાગત કરવામાં આવ્યું હતું.
