વલસાડ LCB ની ટીમે આંતરરાજય સિગારેટ ચોરી કરતા પુના-મહારાષ્ટ્રના બે ઇસમોને 2,14,777/- રૂપિયાના ચોરીના મુદામાલ સાથે ઝડપી પાડ્યા છે પકડાયેલ બન્ને ઇસમોને પકડી સિગારેટ ચોરીના છ (6) ગુના ડીટેકટ કરવામાં આવ્યા છે. આ સિગારેટ ચોર ઈસમો ગુજરાતના વાપી, સુરત તથા મહારાષ્ટ્રના નાશીક, મુંબઇ, મધ્યપ્રદેશ, કર્ણાટકા, આન્ધ્રપ્રદેશ રાજયના અલગ અલગ શહેરી વિસ્તારોમાં દિવસ દરમ્યાન પાન પાર્લર તથા સીગરેટના હોલસેલ વેપારીઓની દુકાનો બહાર રેકી કરી વેપારી જયારે પાન પાર્લર વાળાને ત્યાં સીગરેટનો માલ આપવા આવતો ત્યારે તેના થેલાઓ ચોરી કરીને મોપેડ પર ફરાર થઇ જતા હતાં.
વલસાડ જીલ્લા લોકલ ક્રાઇમ બ્રાંચ દ્વારા આપવામાં આવેલ માહિતી મુજબ LCB ની ટીમે બાતમી આધારે નેશનલ હાઇવે નંબર 48 વાપી જકાતનાકા નજીક વોચ ગોઠવી હતી. જે દરમ્યાન મુંબઇથી સુરત જતા રોડ ઉપરથી આરોપીઓ (1) આકાશ S/O ભવરસીંગ ગુલાબસીંગ રાજપુત (2) રોહન ઉર્ફે ધુમ S/O પલંગે ભગોન ભોસલેને પકડી પાડ્યા હતાં. તેમના કબજામાં રહેલ બે થેલા પૈકી એક કાપડના મોટા થેલામાં ચકાસણી કરતા અલગ અલગ બ્રાંડની સીગરેટના 524 નંગ પેકેટ મળી આવ્યા હતાં. જેમી બજાર કિંમત 55,767 રૂપિયા હતી. બીજા થેલામાંથી અલગ અલગ બ્રાંડની સીગરેટના 620 નંગ પેકેટ નંગ મળી આવ્યાં હતાં. જેની બજાર કિંમત 51,230 રૂપિયા હતી. તેમજ ત્રીજા થેલામાં 443 પેકેટ સિગારેટના હતા જેની કિંમત 47780 રૂપિયા હતી.
કુલ 3 થેલામાંથી પોલીસે 1603 નંગ સિગારેટના પેકેટ જેની કુલ કિંમત 1,54,77 રૂપિયા તથા 50 હજારની કિંમતની નંબર વગરની એકસેસ મોપેડ, મોબાઈલ ફોન મળી કુલ 2,14,777 રૂપિયા નો મુદ્દામાલ જપ્ત કરી પૂછપરછ હાથ ધરી હતી. જેમાં બન્ને આરોપીઓને વાપી ટાઉન પોલીસ મથકના હવાલે કરતા પહેલા મળેલી પ્રાથમિક વિગતો મુજબ આરોપીઓ પુનાથી મોપેડ ઉપર ગુજરાત રાજયના વાપી, સુરત તથા મહારાષ્ટ્રના નાશીક, મુંબઇ, મધ્યપ્રદેશ, કર્ણાટકા, આન્ધ્રપ્રદેશ રાજયના અલગ અલગ શહેરી વિસ્તારોમાં આવતા હતાં. જેઓ દિવસ દરમ્યાન પાન પાર્લર તથા સીગરેટના હોલસેલ વેપારીઓની દુકાન બહાર રેકી કરી વેપારી જયારે પાન પાર્લર વાળાને ત્યાં સીગરેટનો માલ આપવા જાય ત્યારે તેઓના મોપેડ તથા ટેમ્પાઓ રોડ ઉપર પાર્ક કરેલ હોય તેમાંથી સીગરેટના કાર્ટુનોની ચોરી કરી નાસી જતા હતાં.
સિગરેટ ચોરીના ગુન્હામાં પકડાયેલ 1, આકાશ S/O ભવરસીંગ ગુલાબસીંગ રાજપુત ઉ.વ.20 રહે. હાલ પુના મહારાષ્ટ્ર મુળ રહે, જયપુર, રાજસ્થાનનો છે. 2, રોહન ઉર્ફે ધુમ S/O પલંગે ભગોન ભોસલે ઉ.વ.18 વર્ષ 5 મહિના મૂળ પુણા મહારાષ્ટ્રનો વતની છે. જેઓની સામે વાપી ટાઉન પો.સ્ટે., નાશીક શહેરના સાતપુર પોલીસ સ્ટેશનમાં ગુન્હા નોંધાયેલ છે. આ સિગરેટ ચોર પૈકી આજથી આશરે અગિયારેક મહીના પહેલા પકડાયેલ આકાશ રાજપુત તથા તેનો મિત્ર હર્ષા દતા જાદવ સાથે મળી એક સફેદ કલરની એકસેસ મોપેડ લઇને વાપી ખાતે ચોરી કરવા આવ્યા હતાં. અને વાપી દમણ બોર્ડર ઉપર આવેલ એક પાનપાર્લરની દુકાનની સામે રોડ પર પાર્ક કરેલ એક ટેમ્પામાંથી સીગરેટ ભરેલ એક કાર્ટુનની ચોરી કરી હતી.
તેમજ આજથી આશરે દશેક મહીના પહેલા પકડાયેલ આકાશ રાજપુત તથા તેનો મિત્ર શંકર દીગમ્બર નલવડે સાથે એકટીવા મોપેડ નં.MH-14-KT-3816 ની લઇને વાપી ઇમરાન નગર વિસ્તારમાંથી એક સીગરેટ ભરેલ વિમલના થેલાની ચોરી કરી હતી. તો, આજથી આશરે સાડા સાત મહીના પહેલા પકડાયેલ આકાશ રાજપુત તથા તેનો મિત્ર પ્રવિણ વેંકટેશ બાબુ તૈલી સાથે સ્પ્લેન્ડર મો.સા. લઇને કર્ણાટકના બેલગાંવના એક વિસ્તારમાંથી એક એમ.એ.ટી મોપેડ પર રાખેલ એક સીગરેટ ભરેલ થેલાની ચોરી કરી હતી. છ દિવસ પહેલા પકડાયેલ બંને ઇસમોએ સાથે મળી એકસેસ મોપેડ પર નાશીક શહેરમાંથી રોડ પર પાર્ક કરેલ ટેમ્પોમાંથી એક સીગરેટના કાર્ટુનની ચોરી કરી હોવાની કબુલાત કરતા કુલ 6 ગુન્હા ડિટેકટ થયા છે.
ઉલ્લેખનીય છે કે, વલસાડ જીલ્લા પોલીસ અધિક્ષક, ડૉ. કરનરાજ વાઘેલાની સુચના તથા એલ.સી.બી. વલસાડના પો.ઈન્સ. વી. બી.બારડના માર્ગદર્શન હેઠળ લોકલ ક્રાઇમ બ્રાંચના એ.એસ.આઇ. રાકેશ રમણભાઇ તથા અ.હે.કો. મહેન્દ્ર ગુરજીભાઇ તથા અ.પો.કો. રજનીકાંત રમેશભાઈ, આ.હે.કો. અરુણ સીતારામભાઇએ ટીમ વર્કથી આ સફળતા મેળવી છે.