વાપીના ચલા વિસ્તારમાં આવેલ સ્ટાર જેવેલ્સમાં રહેતી હેતલ જીતેન્દ્ર આશર નામની મહિલા પોતાની નવી નક્કોર scorpio કારમાં બીયરનો જથ્થો ભરી વાપીના કુંભારવાડા વિસ્તારમાં રહેતા અને મૂળ રાજસ્થાનના પાલી જિલ્લાના શેવાડી ગામના રહીશ એવા વીલ્કેશ પ્રવિણકુમાર મહેતાને વાપી GIDC ચાર રસ્તા નજીક આવેલ VIA હોલની સામેના રોડ ઉપર આપવા આવી હતી.
જે બાતમી આધારે GIDC પોલીસે મહિલા સહિત બિયરનો જથ્થો ખરીદનાર વીલ્કેશ મહેતાની ધરપકડ કરી કાર્યવાહી હાથ ધરી છે. પ્રોહીબિશનના આ કેસમાં પોલીસે બિયર અને નવીનક્કોર scorpio કાર મળી કુલ 15,07,200નો મુદ્દામાલ જપ્ત કર્યો છે. આ ઘટનાએ મેટ્રોસિટીમાં દારૂની થતી હોમ ડિલિવરીના કિસ્સાને તાજો કર્યો છે.
આ અંગે વધુ મળતી વિગતો મુજબ વાપી GIDC પોલીસ મથકના PC હારીશ કામરુલ ખાન અને HC યોગેશ પેટ્રોલિંગમાં હતા. ત્યારે તેઓને બાતમી મળી હતી કે વાપીના VIA હોલ નજીક રોડ સાઈડમાં એક GJ15-CQ-2312 નંબરની નવી નક્કોર સ્કોર્પિયો કાર પાર્ક થયેલ છે. કારમાં એક મહિલા અને પુરુષ બેસેલા છે. તેમજ કારમાં બિયરના ટીન ભરેલા છે.
આ બાતમી બાદ મહિલા કોન્સ્ટેબલને સાથે લઈ VIA હોલ સામેના રોડ પર પાર્ક કરેલ કાળા કલરની નવી નકોર scorpio માં બેસેલા બંને મહિલા-પુરુષની પૂછપરછ કરી હતી. અને કારમાં તપાસ કરતાં કારની સીટના પાછળના ભાગેથી ત્રણ બોક્સ બિયરના ટીન મળી આવ્યા હતા. કુલ 72 નંગ બિયરના ટીનનો જથ્થો જેની કુલ કિંમત 7200 રૂપિયા અને 15 લાખની કાર સહિત કુલ 15,07,200નો મુદ્દામાલ જપ્ત કરી આગળની કાર્યવાહી હાથ ધરી છે.
પોલીસની પૂછપરછમાં દારૂની ખેપ મારનારી અને ગ્રાહકને દારૂ પહોંચાડવા આવેલી મહિલાએ જણાવ્યું હતું કે તે આ બિયરનો જથ્થો દમણની અલગ અલગ વાઇન શોપમાંથી લાવી હતી. અને તે જથ્થો વિલકેશ મહેતા નામના શખ્સને આપવા આવી હતી. હાલ, સમગ્ર મામલે વાપી જીઆઇડીસી પોલીસે વધુ તપાસ હાથ ધરી છે.