રિપોર્ટ :- જાવીદ ખાં
દમણ :- દમણ પ્રશાસને ગુરુવારે દમણના જાણીતા મીરાસોલ રિસોર્ટ અને મીરાસોલ સ્ટાફ કવાટર્સને કન્ટેઇનમેન્ટ ઝોન જાહેર કર્યું છે. આ રિસોર્ટમાં કેટલાક દિવસથી ‘તારક મહેતા કા ઉલ્ટા ચશ્માં’ સિરિયલનું શૂટિંગ ચાલી રહ્યું છે. અને સીરિયલના કેટલાક કલાકારો ઉપરાંત કૃમેમ્બર અહીં જ રોકાયેલા છે.
દમણ પ્રશાસને મીરાસોલ રિસોર્ટ અને મીરાસોલ રિસોર્ટ સ્ટાફ કવાટર્સને કોવિડ મહામારી હેઠળ કન્ટેનમેન્ટ ઝોનમાં સામેલ કર્યું છે. દમણમાં ગુરુવારે વધુ 23 કોરોના પોઝિટિવ કેસ સામે આવ્યા હતાં. જેથી 4 નવા કન્ટેનમેન્ટ ઝોન જાહેર કર્યા છે. જેમાં મીરાસોલ રિસોર્ટ અને સ્ટાફ કવાટર્સનો સમાવેશ થાય છે. મીરાસોલ રિસોર્ટમાં છેલ્લા ઘણા દિવસથી ‘તારક મહેતા કા ઉલ્ટા ચશ્માં સિરિયલ’નું શૂટિંગ ચાલી રહ્યું છે.
દમણમાં અત્યાર સુધીમાં કોરોનાના કુલ 203 એક્ટિવ કેસ છે. અને અલગ અલગ 26 કન્ટેનમેન્ટ ઝોન જાહેર કરવામાં આવ્યાં છે. જેમાં જે સ્થળે ‘તારક મહેતા કા ઉલ્ટા ચશ્માં’ સિરિયલનું શૂટિંગ ચાલી રહ્યું છે. તે રિસોર્ટ અને સ્ટાફ કવાટર્સમાં કોરોનાના કેસ સામે આવતા તેને કન્ટેનમેન્ટ ઝોન જાહેર કર્યું છે. આ અંગે સુત્રોનું માનીએ તો રિસોર્ટસના સ્ટાફ મેમ્બર સતત તારક મહેતાની ટીમ આસપાસ ફરતા રહેતા હતા. અને સોશ્યલ મીડિયામાં તેના ફોટા પણ અપલોડ કરતા હતાં. ત્યારે એમાંથી જ કોઈનો કોવિડ રિપોર્ટ્સ પોઝિટિવ આવ્યો છે. એટલે પ્રશાસને હાલ આ રિસોર્ટસ અને સ્ટાફ કવાટર્સ ને કન્ટેનમેન્ટ ઝોન જાહેર કર્યો છે.
આ સીરિયલના શૂટિંગ વખતે પણ મુંબઈથી આવેલા કલાકારો અને ક્રુમેમ્બર દમણમાં કોરોનાનો ચેપ ફેલાવશે તેવી હૈયા વરાળ સ્થાનિક લોકોએ સોશ્યલ મીડિયામાં કાઢી હતી. હવે આ રિસોર્ટમાંથી કોવિડ દર્દી મળી આવતા સીરિયલના કોઈ ક્રુમેમ્બર તેમજ રિસોર્ટસના સ્ટાફ મેમ્બરમાંથી કોઈએ કોરોના ફેલાવ્યો હોવાની ચર્ચાએ જોર પકડ્યું છે. જો કે એ અંગે કોઈ સત્તાવાર વિગતો મળી નથી.
કોરોનાને કારણે એન્ટરટેઈનમેન્ટ ઈન્ડસ્ટ્રીનું કામકાજ અસ્તવ્યસ્ત થઈ ગયું છે. કોરોનાના કેસમાં વધારો થતાં મહારાષ્ટ્રે લૉકડાઉન જાહેર કર્યું છે. આ જ કારણે ટીવી તથા ફિલ્મના શૂટિંગ બંધ છે. ટીવી પ્રોડ્યૂસર્સ હાલ ગુજરાતના વાપી તેમજ દમણ, સેલવાસમાં આવીને શૂટિંગ કરી રહ્યાં છે. જેમાં પણ તેમને તાઉ-તે વાવાઝોડાને કારણે નુકસાન સહન કરવાનો વારો આવ્યો છે, જેમાં એક ‘તારક મહેતા કા ઉલ્ટા ચશ્મા’ પણ છે. અહીંયા સેટને ખાસ્સું નુકસાન થયું છે. તો, યે રિશ્તા ક્યાં કહેલાતા હૈ નું શૂટિંગ સેલવાસમાં ચાલી રહ્યું છે. ત્યાં પણ વાવાઝોડાને કારણે સેટને નુકસાન થયું છે. આ અંગે સિરિયલમાં રણવીરનું પાત્ર ભજવતા કરન કુંદ્રાએ સોશ્યલ મીડિયામાં કેટલાંક વીડિયો પણ શૅર કર્યા છે.
ઉલ્લેખનીય છે કે ગુજરાતના વલસાડ જિલ્લા ઉપરાંત દમણ-સેલવાસમાં અલગ અલગ સ્થળો પર ‘તારક મહેતા કા ઉલ્ટા ચશ્મા’, ‘વાગલે કે દુનિયા’, ‘યે રિશ્તા ક્યા કહલાતા હૈ’, ‘કાંટે લાલ એન્ડ સન્સ’, ‘ઇન્ડિયન આઇડલ’ તથા ‘સુપર ડાન્સર’ જેવા શો તથા સિરિયલનું શૂટિંગ થઈ રહ્યું છે. જોકે, અહીંયા વાવાઝોડું આવતા સેટને નુકસાન થયું છે. એ ઉપરાંત સ્થાનિક લોકો કોરોના ચેપને કારણે તેનો વિરોધ પણ કરી રહ્યા છે.