વલસાડ જિલ્લામાં અને સંઘપ્રદેશ દાદરા નગર હવેલી દમણમાં બુધવારના 6 વાગ્યાથી સતત વરસાદી હેલી વરસી રહી છે. ભારે પવન સાથે સતત વરસતા વરસાદી ઝાપટા ને કારણે ઠેરઠેર પાણી ભરાયા છે. તો સમગ્ર જનજીવન અસ્તવ્યસ્ત બન્યું છે.
હવામાન વિભાગની આગામી 5 દિવસ સુધી ભારે વરસાદની આગાહી નો વર્તારો દક્ષિણ ગુજરાત અને સંઘપ્રદેશ દાદરા નગર હવેલી દમણને ફળ્યો છે. વલસાડ જિલ્લામાં અને સંઘપ્રદેશ દાદરા નગર હવેલી દમણમાં ભાદરવા મહિનામાં છેલ્લા 26 કલાકથી સતત વરસાદ વરસી રહ્યો છે. જેનાથી જનજીવન અસ્તવ્યસ્ત બન્યું છે.
હવામાન વિભાગની આગાહી સાથે વલસાડ જિલ્લામાં વરસી રહેલા વરસાદની વિગતો જોઈએ તો વલસાડ તાલુકામાં ગુરુવારે સવારે 8 વાગ્યા સુધીમાં પુરા થતા 26 કલાકમાં દોઢ ઇંચથી 4 ઇંચ સુધીનો સરેરાશ વરસાદ નોંધાયો છે. જેની તાલુકા મુજબ વિગતો જોઈએ તો ઉમરગામ તાલુકામાં 38mm, કપરાડા તાલુકામાં 47mm, ધરમપુર તાલુકામાં 55mm, પારડી તાલુકામાં 73 mm, વલસાડ તાલુકામાં 68mm અને વાપી તાલુકામાં સૌથી વધુ 106mm વરસાદ નોંધાયો છે. સંઘપ્રદેશ દાદરા નગર હવેલીના સેલવાસમાં 54mm, ખાનવેલમાં 38mm તો, દમણમાં સૌથી વધુ 131.6 mm વરસાદ નોંધાયો છે.
સતત વરસતા વરસાદને કારણે જનજીવન અસ્તવ્યસ્ત બન્યું છે. વાપી જેવા શહેરમાં નિચાણવાળા વિસ્તારમાં પાણીનો ભરાવો થયો છે. તો, ઉપરવાસમાં પણ વરસતા વરસાદને કારણે મધુબન ડેમમાં 10577 ક્યુસેક પાણીની આવક થઈ રહી છે. જેની સામે 1 દરવાજો 1 મીટર સુધી ખોલી 6257 ક્યુસેક પાણી દમણગંગા નદીમાં છોડાઈ રહ્યું છે. મધુબન ડેમની સપાટી હાલ 78.50 મીટર પર છે.
વલસાડ જિલ્લો અને સંઘપ્રદેશ દાદરા નગર હવેલી દમણમાં સામાન્ય રીતે સિઝનનો સૌથી વધુ વરસાદ અષાઢ અને શ્રાવણ મહિનામાં જ પડી જાય છે. જો કે આ વર્ષે વાતાવરણમાં આવેલા બદલાવને કારણે મેઘરાજાએ ભાદરવા મહિનામાં પણ સટાસટી બોલાવી છે. જે જોતા સિઝનનો કુલ વરસાદ ગત વર્ષની તુલનાએ વધ્યો છે. જે વિગતો તાલુકા મુજબ જોઈએ તો, ઉમરગામ તાલુકામાં 2190mm, કપરાડા તાલુકામાં સૌથી વધુ 3922mm, ધરમપુર તાલુકામાં 3147mm, પારડી તાલુકામાં 2709mm, વલસાડ તાલુકામાં 2507mm અને વાપી તાલુકામાં 2865mm વરસાદ નોંધાયો છે. સંઘપ્રદેશ દાદરા નગર હવેલીના સેલવાસમાં 3010mm, ખાનવેલમાં 2897mm તો, દમણમાં સૌથી વધુ 3055.6mm વરસાદ નોંધાયો છે. સમગ્ર પંથકમાં વરસાદી પાણીના ભરાવાએ હાલાકી સર્જી છે. તો, આકાશમાં સૂર્યનારાયણ ગાયબ હોય ધુમ્મસછાયા વાતાવરણ વચ્ચે લોકો ઠંડકનો એહસાસ કરી રહ્યા છે.