વાપી GIDC માં હાલમાં જ ઉદ્યોગપતિઓની સોસાયટી ગણાતી સૌરભ સોસાયટીમાં 76 લાખના ખર્ચે અત્યાધુનિક ગાર્ડન બનાવી નાણાપ્રધાનના હસ્તે તેનું ઉદ્ઘાટન કરાવ્યું છે. આ પ્રસંગે નાણાપ્રધાને અને નોટિફાઇડના અધિકારીએ વાપીમાં સુવિધાજનક ગાર્ડન બનાવી નગરજનોને ઉત્તમ હરવાફરવાના અન્ય સ્થળ આપ્યા હોવાની ગુલબાંગો મારી હતી.
જો કે નાણાપ્રધાનના હસ્તે સુંદર ચિલ્ડ્રન પાર્કનું ઉદ્ઘાટન થયું એ અંગેનું કવરેજ www.aurangatimes.com વેબ પોર્ટલ પર પ્રસારિત કર્યા બાદ શહેરના કેટલાક પ્રબુદ્ધ નાગરિકોએ આ ફોટો મોકલ્યા છે. જે વાપીના ગુંજન વિસ્તારમાં આવેલ રામલીલા મેદાનના છે. અહીં ચારે તરફ ગંદકીના ઢગ જોવા મળી રહ્યા છે. ગાર્ડન માં ફુલછોડની કોઈ માવજત થતી હોય તેવું દેખાતું નથી. ગાર્ડનમાં ઠેરઠેર ફરવા આવતા લોકોએ ફેંકેલા ખાણીપીણી ના કચરાના ઢગ જોવા મળે છે. જેમાં બચેલો ખોરાક વળી કૂતરા ખાતા નજરે પડે છે.
આ ગાર્ડનમાં સવાર સાંજ આસપાસના સિનિયર સિટીઝન્સ, બાળકો, મહિલાઓ, યુવાનો દરરોજ વોકિંગ માટે, બેઘડી આરામની પળો માણવા આવે છે. સ્વાસ્થ્યની કાળજી માટે આવતા આ મુલાકાતીઓ માટે અહીં નાકના ટેરવા ચડે તેવી ગંદકી છે. જે સ્વાસ્થ્યને બગાડી રહી છે. મુલાકાતીઓમાં રોષ છે કે GIDC ના ઉદ્યોગકારો આમેય પ્રદુષણને મામલે બદનામ છે. CSR ના ઓઠા હેઠળ ગાર્ડન દત્તક લઈ અધિકારીઓ સામે વ્હાલા બની રહ્યા છે. ત્યારે ખરેખર તેમની ખોરી દાનત છે. જે કંપનીમાં પર્યાવરણ જાળવી નથી શકતા તે શું ખાખ શહેરના ગાર્ડનની માવજત કરશે.
