સંઘપ્રદેશ દમણનાં નાની દમણ શાકભાજી માર્કેટ પાસે આવેલા કાદિર મંજિલ નામના એપાર્ટમેન્ટમાં બીજા માળે આવેલા એક ફ્લેટમાં બુધવારના બપોરના સુમારે આગ લાગવાનો બનાવ બનવા પામ્યો હતો.
બપોરે પરિવાર એર કન્ડીશન ચાલુ કરી બેઠા હતા એ દરમ્યાન અચાનક એ.સી. માં શોર્ટ સર્કિટ થતાં એ.સી. ના યુનિટમાં આગ ભભુકી ઉઠી હતી. અચાનક આગ લાગતાં જ પરિવારના સભ્યો તુરંત સુરક્ષિત પણે ફલેટમાંથી બહાર નીકળી ગયા હતા. અને ઘટનાની જાણ મોટી દમણ ફાયર વિભાગ ને કરી હતી. 
આ તરફ ફ્લેટમાં આગ લાગતાં જ ઘરમાંથી કાળો ધુમાડો બહાર નીકળતા શાકભાજી માર્કેટના વેપારીઓ અને અન્ય લોકો બિલ્ડિંગ પાસે એકત્ર થઈ ગયા હતા. આગ લાગ્યા ની જાણ ફાયર વિભાગ ને થતાં જ મોટી દમણ ફાયર વિભાગ ની એક ટીમ અને નાની દમણ સોમનાથ ફાયર વિભાગ ની એક ટીમ ગણતરીની મિનિટોમાં બનાવ સ્થળે પહોંચ્યા હતા.
ફ્લેટમાં લાગેલી આગ પર પાણીનો મારો ચલાવી આગ ને કાબૂમાં લીધી હતી. જો કે, ફાયર વિભાગ ની ટીમ પહોંચે એ પહેલા રૂમનું એ.સી. સહિત ગાદલા તથા અન્ય સમાન બળી ને ખાખ થઈ ગયો હતો. સદનસીબે આ બનાવમાં ફ્લેટમાં રહેતા પરીવારની સતર્કતા ને પગલે જાનહાની ટળી હતી.