દમણના વરકુંડ વિસ્તારમાં ગઈ કાલે જમીનના ઝઘડામાં થયેલી મારામારીમાં એક યુવક પર ધારદાર હથીયાર વડે જીવલેણ હુમલો કરવામાં આવતા તેને સારવાર અર્થે મરવડ સરકારી હોસ્પિટલમાં દાખલ કરવામાં આવ્યો હતો,
વરકુંડ ગામના મોટા ફળિયામાં રહેતા તુષાર ભગવાનભાઈ પટેલ અને તેમના કુટુંબીજનો વચ્ચે છેલ્લા 10 વર્ષથી જમીનને લઈને બબાલ ચાલી રહી છે, જે દરમ્યાન ગઈ કાલે તેમના સંબંધીઓ રાજેશ અમરસિંહ તેમની પત્ની ભારતી રાજેશ , જયસિંહ રવજી, મુકેશ જયસિંહ અને સચિન જયસિંહે મળીને તુષારભાઈના ઘર તરફ જવાનો રસ્તો બંધ કરી દીધો હતો, અને લાકડા, લોખંડના પાઇપ અને છરા સહિતના ધારદાર હથિયારો વડે તુષારભાઈના પરિવાર પર હુમલો કર્યો હતો, જેમાં રાજેશ અમરસિંહ જયસિંહ રવજી, મુકેશ જયસિંહ અને સચિન જયસિંહે મળીને ધારદાર છરા વડે તુષારના કાકાના પુત્ર પર હુમલો કરતા તેને બચાવવા વચ્ચે પડેલા તુષારના પેટ, પીઠના ભાગે છરાના ઘા લાગ્યા હતા,
હુમલો કર્યા બાદ તમામ આરોપીઓ ફરાર થઇ ગયા હતા, જયારે હુમલામાં ઘાયલ થયેલા તુષારને તાત્કાલિક સારવાર અર્થે મરવડની સરકારી હોસ્પિટલમાં દાખલ કરવામાં આવ્યો હતો, ઘટનાની જાણ પોલીસને કરવામાં આવતા પોલીસે તાત્કાલિક ઘટના સ્થળે પહોંચીને હુમલાખોર આરોપીઓ વિરુદ્ધ વિવિધ કલમો હેઠળ ગુનો નોંધી તમામ આરોપીઓને પકડવાની તજવીજ હાથ ધરી હતી