વાપીમાં આવેલ રોફેલ BBA-BCA કોલેજ દ્વારા કોલેજના વાર્ષિકોત્સવ અને ઇનામ વિતરણ કાર્યક્રમનું આયોજન કરવામાં આવ્યું હતું. જેમાં કોલેજના ટ્રસ્ટીઓ તેમજ વલસાડ જિલ્લા પોલીસવડાના હસ્તે યુનિવર્સિટી લેવલે વિવિધ સ્પર્ધાઓમાં કોલેજનું નામ રોશન કરનાર વિદ્યાર્થીઓને સર્ટિફિકેટ, ટ્રોફી આપી સન્માનિત કરવામાં આવ્યા હતાં.
વિદ્યાર્થીઓના વ્યક્તિત્વ વિકાસ માટે કોલેજમાં અભ્યાસ સાથે ઇત્તરપ્રવૃત્તિઓ પણ અતિ આવશ્યક હોય છે. તેથી કોલેજમાં રમતગમત, ચિત્ર સંગીત, નાટક, અભિનય ગીત, કવીઝ અને વકૃત્વ સ્પર્ધા જેવા કાર્યક્રમોનું આયોજન કરવામાં આવે છે. આવા જ ઉદેશ્ય સાથે રોફેલ બીબીએ-બીસીએ કોલેજ પણ વિદ્યાર્થીઓને આખું વર્ષ અભ્યાસ સાથે અન્ય પ્રવુતિઓમાં ભાગ લેવાની તક આપી પ્રોત્સાહન પૂરું પાડે છે.
ત્યારે આવી ઇન્ટરકોલેજ અને યુનિવર્સિટી લેવલની સ્પર્ધાઓમાં કોલેજનું નામ રોશન કરનાર વિદ્યાર્થીઓ સાથે અન્ય વિદ્યાર્થીઓ માટે કોલેજ દ્વારા “પ્રોત્સાહન 2023” વાર્ષિકોત્સવ અને ઇનામ વિતરણ કાર્યક્રમનું 28મી માર્ચે વીઆઇએ હોલ ખાતે આયોજન કરવામાં આવ્યું હતું. આ કાર્યક્રમમાં વલસાડ જિલ્લાના સુપ્રિન્ટેન્ડેન્ટ ઓફ પોલીસ વિજયસિંહ ગુર્જર મુખ્ય મહેમાન તરીકે ઉપસ્થિત રહ્યા હતાં.
કાર્યક્રમમાં કોલેજના ટ્રસ્ટીઓ, આમંત્રિત મહેમાનો તેમજ રોફેલ બીબીએ-બીસીએ કોલેજના આચાર્ય ડૉ. પ્રિયકાન્ત વેદ દ્વારા મંગલદીપ પ્રગટાવી કાર્યક્રમનો શુભારંભ કરાવ્યો હતો. આચાર્ય દ્વારા કોલેજનો આખા વર્ષનો અહેવાલ રજૂ કરવામાં આવ્યો હતો. મુખ્ય મહેમાને પ્રસંગને અનુરૂપ પ્રેરક વાતો કહી પ્રોત્સાહિત કર્યા હતા. મુખ્ય મહેમાનને હસ્તે વિદ્યાર્થીઓને સાંસ્કૃતિક અને રમત ગમત ક્ષેત્રે મેળવેલી સિદ્ધિઓની ટ્રોફી અને સર્ટિફિકેટ આપી નવાજવામાં આવ્યા હતા.
પ્રોત્સાહન 2023ના આયોજનમાં વિવિધ સાંસ્કૃતિક કાર્યક્રમ જેમાં ગરબા, રાસ, પિરામિડ, નાટકમાં વિદ્યાર્થીઓના અભિનય અને તેમના રંગબેરંગી પોષાકે મહેમાનોના દિલ જીત્યા હતા. આ પ્રસંગે વલસાડ જિલ્લા પોલીસવડાએ પોતાના પ્રેરક ઉદબોધનમાં પોતે કઈ રીતે ઑછી ટકાવારી મેળવ્યા બાદ અને અનેક વખત નિષ્ફળ રહ્યા પછી પણ IPS બન્યા તેની વાત કહી વિદ્યાર્થીઓને હંમેશા જીવનમાં ઊંચા વિચારો સાથે સતત મહેનત કરતા રહેવાની શીખ આપી હતી. તેમજ આજના સોશ્યલ મીડિયાના જમાનામાં પોતાના માટે પોતાની કારકિર્દી માટે કેવી રીતે સમય ફાળવી ઉચ્ચ સિદ્ધિ હાંસલ કરી શકાય તે અંગે માર્ગદર્શન આપ્યું હતું.
