ધાર્મિક વિવાદોવાળી ધરમપુર બેઠક પર કોંગ્રેસને ઝાકારો આપ્યા બાદ ભાજપથી અસંતુષ્ટ આમ મતદારો માટે કોણ ખાસ આપ કે અપક્ષ?  

આ વિધાનસભા બેઠક પર 2022ની ચૂંટણીને લઈ 9 ઉમેદવારો મેદાનમાં છે. જેમાંથી 3 અપક્ષ ઉમેદવારો છે. જ્યારે 6 ઉમેદવારો અલગ અલગ પક્ષ ના બેનર હેઠળ ચૂંટણી લડી રહ્યા છે. ધરમપુર બેઠક પર 1,25,245 પુરુષ મતદારો, 1,25,801 સ્ત્રી મતદારો મળી કુલ 2,51,801 મતદારો છે. દર વર્ષે આ બેઠક પર મતદાનની ટકાવારી પ્રમાણમાં ખૂબ સારી રહી છે. વર્ષ 2017માં આ બેઠક પર ભાજપના ઉમેદવાર અરવિંદ પટેલ ચૂંટણી જીત્યા હતાં. મતદારોએ કોંગ્રેસના ઉમેદવારને ઝાકારો આપી ભાજપના ઉમેદવાર પર ભરોસો કર્યો હતો. જો કે તે બાદ સતત 5 વર્ષ સુધી આ વિસ્તારમાં કેન્દ્ર સરકારની અને રાજ્ય સરકારની વિવિધ યોજનાઓ થકી વિકાસના કામો થયા. પરંતુ તેમ છતાં ધરમપુર શહેરના શહેરી લોકોની સરખામણીએ ગ્રામ્ય આદિવાસી લોકો માટે પાયાની સુવિધાઓ પુરી પાડવામાં અનેક ચૂક રહી ગઈ છે.

આ બેઠક પર જળ, જમીન, જંગલ ને લઈ અનેકવાર લોકોએ રસ્તા પર આવી આંદોલનો કર્યા છે. અનેકવાર સરકાર સામે બાથ ભીડી અવેદનપત્રો આપી આક્રોશ ઠાલવ્યો છે. ભાજપના કે કોંગ્રેસના નેતાઓએ માત્ર તેમનું અને તેમના માનીતાઓનો જ ઉદ્ધાર કર્યો હોવાના આક્ષેપો થયા છે. રોડ, ગટર, આરોગ્ય, શિક્ષણ, રોજગારી ના વાયદાઓ અહીં ધરાતલ પર સાકાર થયા નથી. એવામાં ભાજપે ફરી અરવિંદ પટેલને રિપીટ કર્યા છે. તો, કોંગ્રેસમાં કિશન પટેલે પોતાના અભરખા પુરા કરવા ફરી ચૂંટણી જંગમાં ઝંપલાવી કોંગ્રેસ તરફથી અને સ્થાનિક મતદારો તરફથી જેને ઉમેદવારી કરાવવાની હતી તે કલ્પેશ પટેલને અપક્ષ તરીકે ચૂંટણી લડવાની ફરજ પાડી છે.

હાલ આ બેઠક કબ્જે કરવા ભાજપના ઉમેદવાર એડીચોટીનું જોર લગાવી રહ્યા છે. કોંગ્રેસ ના ઉમેદવાર પણ ભાજપની પોલ ખોલતી ઓટલા બેઠકો કરી રહ્યા છે. અપક્ષ ઉમેદવાર કલ્પેશ પટેલ ગામના દરેક મહોલ્લા માં જઇ પોતાને જીત અપાવવા મતદારોને રિઝવી રહ્યા છે. આ ચૂંટણીમાં ભાજપ-કોંગ્રેસ-અપક્ષ સામે ચોથું ફેક્ટર આમ આદમી પાર્ટી છે. આમ આદમી પાર્ટી દ્વારા આ બેઠક પર આદિવાસી સમાજમાં પ્રભુત્વ ધરાવતા કમલેશ પટેલને મેદાને ઉતાર્યા છે. જેઓ પણ ડોર ટૂ ડોર ચૂંટણી પ્રચાર સાથે સોશ્યલ મીડિયા પર પોતાની જીત માટે પ્રચાર કરી રહ્યા છે. એટલે આ બેઠક પર ચતુષ્કોણીય જંગ છે.