ગુજરાત વિધાનસભાની ચૂંટણી 2022ની તારીખ આજે (ગુરુવાર 3 નવેમ્બર 2022ના) ચૂંટણીપંચે જાહેર કરી છે. જે મુજબ આવનારી 1લી ડિસેમ્બરે વલસાડ જિલ્લાની 5 બેઠકોની ચૂંટણીનું મતદાન થશે. વલસાડની બેઠકો પર પ્રથમ તબક્કામાં મતદાન થવાનું છે. 8મી ડિસેમ્બર પરિણામ જાહેર થશે. આ વખતની વિધાનસભાની ચૂંટણીમા મતદાન કરવા માટે નવા 1.48 લાખ મતદારોનો વધારો નોંધાયો છે. જેમાં 17 હજાર નવા યુવા મતદારો છે. વલસાડ જિલ્લામાં 2022ની વિધાનસભાની ચૂંટણીમાં અંદાજિત 13,16,598 જેટલા મતદારો છે.
વલસાડ જિલ્લાની વિધાનસભાની બેઠકો ઉપર ચૂંટણી જીતવા માટે ભાજપ, કોંગ્રેસ અને આમ આદમી પાર્ટી સહિતની પાર્ટીઓના ઉમેદવારો ચૂંટણી જંગમાં ઉતરશે. રાજકીય પક્ષોની આ વખતની ચૂંટણીમાં નવા મતદારો પર નજર મંડાઇ છે. ગત વર્ષે 2017ની ચૂંટણીમાં 11,67,718 મતદારો હતા. જ્યારે 2022ની વિધાનસભાની ચૂંટણીમાં 13,16,598 જેટલા મતદારો નોંધાયા છે. આ વર્ષે 17 હજાર નવા યુવા મતદારો પ્રથમ વખત માતાધિકારનો ઉપયોગ કરશે.
ગુજરાતની વિધાનસભાની ચૂંટણીની જાહેરાતના પડઘમ વાગી ગયા છે. વિધાનસભાની બેઠકમાં ઉમેદવારી નોંધાવવા માટે ઉમેદવારોમાં ભારે ઉત્સાહ જોવા મળ્યો છે. ઉમેદવારો પોતાના સમર્થકો સાથે વિધાનસભાની બેઠક માટે દાવેદારી નોંધાવી ચુક્યા છે. ગત 2017ની વિધાનસભાની ચૂંટણી વખતે જિલ્લાના 5 વિધાનસભા મત વિસ્તારોમાં કુલ 11,67,718 મતદારો નોંધાયા હતા. 2022ની હાલ યોજાનાર ચૂંટણી માટે કુલ મતદારોની સંખ્યા વધીને 13,16,598 થઈ છે.
વિધાનસભાની ચૂંટણીમાં જિલ્લામાં કુલ 1,48,880 નવા મતદારો નોંધાયા છે. રાજકીય પક્ષોના કાર્યકરોએ આ મતદારો સુધી પહોંચવા માટે તૈયારી હાથ ધરી છે. વલસાડ જિલ્લામાં ભાજપ, કોંગ્રેસ, આમઆદમી પાર્ટી તમામ બેઠકો ઉપર ચૂંટણી લડશે. જે માટે યુધ્ધના ધોરણે પ્રચાર પ્રસારની તૈયારી આરંભી ચુક્યા છે.
જિલ્લાની પાંચેય વિધાનસભા દીઠ મતદારોની વિગતો જોઈએ તો, વલસાડ વિધાનસભા બેઠકમાં વર્ષ 2017માં 2,43,884 મતદારો હતાં. હાલમાં 2022 માં 130854 મહિલા મતદારો, 133452 પુરુષ મતદારો મળી કુલ 2,64,306 મતદારો છે.
પારડી વિધાનસભા બેઠકમાં વર્ષ 2017માં 2,20,845 મતદારો હતાં. હાલમાં 2022 માં 1,22,524 મહિલા મતદારો, 1,36,738 પુરુષ મતદારો મળી કુલ 2,59,262 મતદારો છે.
ધરમપુર વિધાનસભા બેઠકમાં વર્ષ 2017માં 2,26,284 મતદારો હતાં. હાલમાં 2022 માં
1,15,801 મહિલા મતદારો, 1,25,245 પુરુષ મતદારો મળી કુલ 2,41,046 મતદારો છે.
કપરાડા વિધાનસભા બેઠકમાં વર્ષ 2017માં 2,32,224 મતદારો હતાં. હાલમાં 2022 માં 1,31,195 મહિલા મતદારો, 1,35,375 પુરુષ મતદારો મળી કુલ 2,66,570 મતદારો છે.
ઉમરગામ વિધાનસભા બેઠકમાં વર્ષ 2017માં 2,44,484 મતદારો હતાં. હાલમાં 2022 માં 1,33,494 મહિલા મતદારો, 1,51,902 પુરુષ મતદારો મળી કુલ 2,85,396 મતદારો છે.