દમણના ખારીવાડ વિસ્તારમાં આવેલ દાર ઉસ સલામ એપાર્ટમેન્ટમાં મંગળવારે મળસ્કે 4 વાગ્યા આસપાસ ભોંયતળિયે અચાનક આગ ભભૂકી ઉઠતા અફરાતફરી મચી હતી. પાર્કિંગ એરિયામાં આગની જ્વાળાએ 18 જેટલી બાઇકને તેમની ચપેટમાં લીધી હતી. તો, આગના ધુમાડાના ગોટેગોટા ઉઠતા ગૂંગળામણ અનુભવતા એપાર્ટમેન્ટના 35 જેટલા લોકોએ અગાસી પર જઈ આશરો લીધો હતો. જે તમામ ને દમણ ફાયરે રેસ્ક્યુ કર્યા હતાં.
ઘટના અંગે દમણ ફાયર વિભાગે આપેલી વિગતો મુજબ મંગળવારે વહેલી સવારે 4 વાગ્યા આસપાસ કોલ આવ્યો હતો કે દમણના ખારીવાડ વિસ્તારમાં આવેલ દાર ઉસ સલામ એપાર્ટમેન્ટમાં ભીષણ આગ લાગી છે. જેની જાણકારી મળ્યા બાદ ફાયરની 3 ગાડીઓ રવાના કરાઈ હતી. આગ જે ઇમારતમાં લાગી હતી તે 8 માળની હતી. અને તેના પાર્કિંગ એરિયામાં આગ ભભૂકતી જોવા મળી હતી. ફાયરના જવાનોએ તાત્કાલિક આગ પર પાણીનો મારો ચલાવી આગને કાબુમાં લીધી હતી.
જો કે આગને કારણે ધુમાડાના ગોટેગોટા ઉઠ્યા હતાં. જેનાથી પ્રથમ 3 માળ સુધીના રહેવાસીઓએ ગૂંગળામણ અનુભવી હોય ટેરેસ પર આશરો લીધો હતો. જ્યારે પાર્કિંગમાં આગને કારણે પાર્ક કરેલ 18 જેટલા બાઇક બળીને ખાખ થયા હતાં. દમણ ફાયરના જવાનોએ આગ પર કાબુ મેળવ્યા બાદ ધુમાડાનું પ્રમાણ હળવું થતા સીડી ની મદદથી ટેરેસ પર પહોંચી ટેરેસ પર ગભરાયેલા 35 જેટલા રહેવાસીઓને રેસ્ક્યુ કર્યા હતાં. જેમાં 2 વૃદ્ધ હોય તેમને અને એક પેરેલીસીસ વ્યક્તિને સ્ટ્રેચરની મદદથી નીચે ઉતાર્યા હતાં. ધુમાડાના કારણે શ્વાસ લેવામાં તકલીફ અનુભવતા પેરેલીસીસ દર્દીને મરવડ હોસ્પિટલે સારવાર માટે ખસેડાયા હતાં. જો કે આ આગની ઘટનામાં કોઈ જાનહાની થઈ નથી.
ઉલ્લેખનીય છે કે આગની ઘટનામાં પાર્કિંગમાં રહેલા 18 જેટલા બાઇક ઉપરાંત પ્રથમ 3 માળ સુધીના ફ્લેટમાં ઘરવખરી-ફર્નિચર, AC જેવી ઇલેક્ટ્રોનિક્સ આઈટમ બળીને ખાખ થઈ હોય એપાર્ટમેન્ટ ના રહેવાસીઓએ ભારે નુકસાની સહન કરવી પડી છે. તો, આગ લાગવાનું પ્રાથમિક તારણ શોર્ટસર્કિટ હોવાનું જાણવા મળ્યું હતું.