વલસાડ જિલ્લાના ઉમરગામ GIDC માં આવેલ પ્લે ગ્રાઉન્ડ ખાતે UIA દ્વારા ભવ્ય Industrial EXPO 2024નું આયોજન કરવામાં આવ્યું હતું. આ ત્રિદિવસીય EXPOનું સોમવારે સમાપન કરવામાં આવ્યું હતું. Industrial Technology અને Innovation નો અદભુત નજારો જોવા આ ત્રણ દિવસમાં અંદાજીત 80 હજારથી વધુ મુલાકાતીઓ ઉપસ્થિત રહયા હતાં. જેઓએ ઉમરગામ GIDC માં બનતી રસોડાથી લઈને શૈક્ષણિક સ્ટેશનરી, જીવન જરૂરિયાતની ચીજવસ્તુઓ, વિવિધ ઉદ્યોગોની મશીનરી, પાર્ટસના સ્ટોલનું પ્રદર્શન નિહાળ્યું હતું.
આ EXPO અંગે UIA પ્રમુખ નરેશ બાંથિયા એ જણાવ્યું હતું કે, લોકોનો ખૂબ જ સારો રિસ્પોન્સ મળ્યો છે. જેનાથી UIA ટીમને નવી ઉર્જા મળી છે. અમે દર 2 વર્ષે આ પ્રકારના EXPO નું આયોજન કરીશું અને તે EXPO આનાથી પણ વધુ ભવ્ય હશે. UIA પ્રમુખના જણાવ્યા મુજબ આ EXPO માં સમગ્ર વલસાડ જિલ્લો, પાલઘર જિલ્લો, દાદરા નગર હવેલી દમણ સેલવાસ અને દક્ષિણ ગુજરાત, મહારાષ્ટ્રના અન્ય વિસ્તારમાંથી પણ લોકો ઉપસ્થિત રહ્યા હતાં.
આ EXPO માં સ્ટોલ લગાવનાર ઉદ્યોગકારો એ પણ UIA ટીમને આ સરસ આયોજન બદલ અભિનંદન પાઠવ્યા હતાં. અને અન્ય શહેરમાં યોજાતા EXPO ની તુલનાએ અહીં તેઓને સારો રિસ્પોન્સ મળ્યો હોવાનું જણાવ્યું હતું. તો મુલાકાતીઓએ પણ EXPO અંગે પોતાની પ્રતિક્રિયા આપી હતી. અને આ પ્રકારનું આયોજન ઉમરગામમાં પ્રથમ વખત થયું છે. જે આયોજન દર વર્ષે થાય તો વધુ આનંદ આવે તેવું જણાવ્યું હતું.
સોમવારે ક્લોઝિંગ સેરેમની પ્રસંગે EXPO માં સહયોગ આપનાર ઉદ્યોગપતિઓનું સન્માન કર્યું હતું. એક્સપોમાં વિવિધ કેટેગરી હેઠળ એવોર્ડ આપવામાં આવ્યા હતાં. જેમાં ઉત્પાદનોમાં શ્રેષ્ઠ પ્રદર્શન કરનાર ડોમ્સ ઇન્ડસ્ટ્રીઝ, એવરેસ્ટ ફૂડ પ્રોડક્ટ્સ પ્રાઇવેટ લિમિટેડ, કોપ્ટેક (ન્યૂ ઈન્ડિયા ગ્રુપ)ને સ્મૃતિચિહ્ન આપી સન્માનિત કરવામાં આવ્યાં હતાં.
ઉત્પાદન તેમજ મશીનરીમાં શ્રેષ્ઠ તકનીક માટે પેન્ટા ઓટોમેશન સિસ્ટમ્સ પ્રાઇવેટ લિમિટેડ, સ્કેલ ગાર્ડને શ્રેષ્ઠ સ્ટોલ ડિઝાઇનિંગ કેટેગરીમાં હિન્દુસ્તાન પેન્સિલ્સ, લિંક પેન, સીએસ કોમ્પોનન્ટ્સને જ્યારે પ્રદર્શનમાં શ્રેષ્ઠ કેટેગરીમાં ચંદન સ્ટીલ, અમર ટી / સોસાયટી ટી પ્રાઇવેટ લિમિટેડ, અપાર ઇન્ડસ્ટ્રીઝને એવોર્ડ આપી સન્માનિત કરવામાં આવ્યાં હતા.
આ EXPO ના ત્રણ દિવસમાં રાજકીય આગેવાનો, ઉદ્યોગકારો, GIDC ના અધિકારીઓ, અન્ય વિવિધ એજન્સીઓના સરકારી અધિકારીઓ પણ વિશેષ ઉપસ્થિત રહ્યા હતાં. તમામે UIAની ટીમને આ સુંદર એક્સ્પો ના આયોજન બદલ અભિનંદન પાઠવ્યા હતાં. ઉમરગામ GIDC માં UIA દ્વારા આયોજિત Umargam Industrial EXPO 2024ને સફળ બનાવવા UIA પ્રમુખ નરેશ બાંથિયા, ઉપરાંત આશિષ શાહ, તાહિર વ્હોરા સહિતના હોદ્દેદારોએ ભારે જહેમત ઉઠાવી હતી.
