વાપીના ચણોદ કોલોની સ્થિત કેશવજી ભારમલ સુમરીયા કોમર્સ એન્ડ નટરાજ પ્રોફેશનલ સાયન્સીસ કોલેજ, વાપીમાં વિધાર્થીઓ માટે પ્રસંગોપાત વિવિધ કાર્યક્રમોની ઉજવણી કરતા આયોજન કરવામાં આવે છે. જે અંતર્ગત મટકી ફોડ સ્પર્ધાનું આયોજન કરવામાં આવ્યું હતું.
કોલેજના પ્રાંગણ માં એબીવીપી અને રોટ્રેકટ ક્લબ વાપીના સહયોગથી શ્રી કૃષ્ણ ભગવાનના જન્મની ઉજવણીના ભાગરૂપે વાપીની વિવિધ કોલેજો માટે આંતર કોલેજ મટકી ફોડ (દહીં હાંડી) સ્પર્ધાનું આયોજન કરવામાં આવ્યું હતું. જેમાં વાપીની 4 કોલેજોએ ભાગ લઈ ખુબજ જુસ્સાભેર અને ઉલ્લાસથી મટકી ફોડ સ્પર્ધામાં ભાગ લઈ કાર્યક્રમની ઉજવણી કરી હતી.
આ સ્પર્ધામાં વાપી -વલસાડ ઝોન ના એબીવીપીના હોદ્દેદારો અને મુખ્ય મહેમાન તરીકે વલસાડ જિલ્લા લના ડી.વાય.એસ.પી. બી. એન. દવે તેમજ ડૉ. ચિંતન અને રોટેરિયન સંજય બડોલે હાજર રહ્યા હતા. આ સ્પર્ધામાં રોફેલ ફાર્મસી બોયઝ ચેમ્પિયન અને રોફેલ બી.બી.એ કોલેજ રનર્સઅપ રહી હતી. સમગ્ર કાર્યક્રમ સફળ રહેતા કોલેજના આચાર્ય ડૉ. પુનમ બી.ચૌહાણે આયોજકો, ભાગ લીધેલ સ્પર્ધકો અને સ્ટાફ મિત્રો નો આભાર વ્યક્ત કરી વિજેતા ટીમ ને અભિનંદન પાઠવ્યા હતા.