વાપી નજીક બલિઠા ગામે બુધવારનો દિવસ ગોઝારો સાબિત થયો હતો. એક જ દિવસમાં સર્જાયેલ બસ અને કારના અલગ અલગ 2 અકસ્માતમાં કુલ 3 લોકોની જિંદગી છીનવાઈ ગઈ છે. અકસ્માતમાં 2 સગા ભાઈઓ અને એક મહિલાનું મોત થતા પંથકમાં અરેરાટી ફેલાઈ ગઈ છે.
ઘટના અંગે વાપી ટાઉન પોલીસ મથકમાંથી મળતી વિગતો મુજબ બુધવારે સવારે બલિઠા હાઇવે નંબર 48 પર ટોયોટા શૉ રૂમ નજીક સલવાવના 35 વર્ષીય પાર્વતીબેન પારસભાઈ નામની મહિલા હાઇવે ક્રોસ કરી રહી હતી ત્યારે અચાનક જ પુરપાટવેગે વેગે ધસી આવેલ કાર નંબર DD03-E-2187ના ચાલક અભિનવ પટેલે તેને અડફેટે લેતા ઘટના સ્થળે જ કમકમાટીભર્યું મોત નીપજ્યું હતું. કાર ચાલક મૂળ પારડીનો છે. અને વાપી તરફ આવતી વખતે આ અકસ્માત સર્જી દીધો હતો.
જ્યારે બપોર બાદ બલિઠાના દાંડીવાડ તરફ કબ્રસ્તાન રોડ પર સ્વામિનારાયણ ગુરુકુલની સ્કૂલ બસની અડફેટે આવી જતા બે સગા ભાઈઓનું કમકમાટીભર્યું મોત નીપજ્યું હતું. આ ઘટનામાં પોલીસે વિગતો આપી હતી કે, બલિઠા માં રહેતા રણછોડભાઈ ભરવાડના પુત્રો વિશાલ અને જય બાઇક નંબર GJ15-SS-3241 લઈને વાપીમાં ખરીદી કરવા નીકળ્યા હતાં. ત્યારે માર્ગ પર પુરપાટ ઝડપે જતી સ્કૂલ બસ નંબર GJ15-AT-8315ના પાછળના વ્હીલમાં આવી જતા બંને ભાઇઓ ના સ્થળ પર જ મોત થયા હતાં.
ઘટનાની જાણકારી આસપાસના લોકોને થતા તેઓ દોડી આવ્યા હતાં. જેઓએ વાપી ટાઇન પોલીસ મથકમાં જાણકારી આપતા પોલીસે ત્રણેય મૃતદેહોને એમ્બ્યુલન્સ મારફતે ચલા સરકારી હોસ્પિટલમાં PM માટે મોકલી આગળની કાર્યવાહી હાથ ધરી છે. ઉલ્લેખનીય છે કે, એક જ દિવસમાં 2 અલગ અલગ ઘટનામાં 3 લોકોના મોત થતા પંથકમાં અરેરાટી ફેલાઈ છે.
